MINNEAPOLIS, MERKA, AFP.- E veredikto kontra e eks agente koló kla deklará kulpabel pa asesinato di George Floyd a oumentá un ola di speransa entre afroamerikanonan, ounke e morto di un adolesente koló skur na man di un agente polisial koló kla ta mustra ku ainda e kaminda ta largu.
Despues di tres siman di un proseso yen di tenshon, 12 miembro di hurado a konkluí den ménos di 24 ora ku e akusado ta kulpabel di tur tres akusashon den su kontra: asesinato di segundo i terser grado i “dood door schuld”. E desishon aki no ta masha frekuente den e pais aki kaminda masha poko ta kondená polisnan pa e komportashon aki.
Pero mayoria no a tarda pa señalá ku “nos mester sigui lucha pa tur minoria marginalisá ku e pèrdè nan bida dor di violensia di polis”, asina e abogado Crump a tweet.
Pa presidente Joe Biden, e veredikto por marka “un gran paso pa dilanti den hustisia di Merka” i kondusí na un “kambio signifikativo”.
