BEIJING, AP.- Outoridat chines a kuminsá implementá un sistema nobo di vigilansia. Ta trata di un programa di rekonosimentu ku ta usa e forma di kana di un persona pa identifik’é. Esaki ta konta den kaso ku e persona aki tapa su kara pa kámara tambe.
E teknologia aki ta parti di un inisiativa den China kompleto pa desaroyo di vigilansia mediante uso di dato i inteligensia artifisial. Polisnan di Beijing i Shanghai ya ta usando e teknologia aki.
Huang Yongzhen, direktor general di Watrix, a bisa ku e sistema por identifiká e persona desde 50 meter leu, asta si e persona ta ku lomba òf si e kubri su kara pa kámara. Esaki por yena un bashí den e teknologia ku ta rekonosé kara di un persona, kual ta rekerí imágennan di resolushon haltu di e kara di un persona pa asina e por funshoná di forma adekuá.
Watrix a anunsiá di a rekoudá 14,5 mion dòler pa aselerá e desaroyo i benta di e teknologia, segun indikashon di prensa chines.
Polis chines ta usa programanan di rekonosimentu di kara pa identifiká un persona den multitut grandi òf pa sanshoná esnan ku krusa kaya di forma inadekuá. Ademas, e pais ta desaroyando un sistema nashonal integrá pa datonan di kámara di seguridat. Algun persona ta inkómodo ku e uso di rekonosimentu di forma di kana.
