BRUSELAS, BÈLGIKA, AFP.- Union Europeo a bai di akuerdo djamars pa redusí konsumo di gas pa ta ménos dependiente di Rusia, ku a anunsiá ku lo suministrá ménos gas na Europa i lansa bombardeonan “masivo” na sùit di Ukrania.
“Esaki no tabata un mishon imposibel. E ministernan a yega na un akuerdo polítiko riba e redukshon di demanda di gas pa próksimo wenter”, segun indikashon di presidensia cheko riba Twitter, kual ta ehersé presidensia rotativo di Konseho di Union Europeo.
E ministernan a reuní na Bruselas pa firma un plan pa spar gas proponé pa e Komishon siman pasa. E kontenido a keda modifiká ampliamente, ounke mayoria punto prinsipal a keda meskos.
E dokumento aprobá ta establesé ku kada pais mester hasi “lo máksimo posibel” pa redusí konsumo di gas ku por lo ménos 15% entre ougùstùs 2022 i mart 2023, kompará ku e averahe di e último sinku añanan den e mesun periodo.
E presidente di Komishon Europeo, Ursula von der Leyen, a bisa ku e kompromiso “kolektivo a signifikativo” i lo yuda kada pais prepará pa temporada di wenter.
