SAN JOSE, COSTA RICA, AFP.- Míles di persona a sali riba kayanan di San José ayera pa protestá na defensa di edukashon públiko na Costa Rica i pa eksigí gobièrnu pa subi presupuesto pa esaki.
Studiantenan universitario, maestronan i trahadónan di sentronan edukashonal a marcha masalmente. Nan a sali for di diferente parti di e kapital pa konkluí dilanti di Parlamento.
“E pais aki semper a wòrdu karakterisá komo un pais demokrátiko ku un faktor diferente, edukashon i kultura. Aktualmente gobièrnu ta redusiendo tur presupuesto, tur garantia i programanan sosial”, asina Vanesa Valerio, un akadémiko di 53 aña di Universidad Nacional (UNA), a bisa na AFP.
E petishon prinsipal di e manifestashon ta pa gobièrnu oumentá e presupuesto pa Fondo Spesial di Edukashon superior (FEES) ku 1%, manera e gobièrnu di presidente Rodrigo Chaves a primintí un aña pasá, ora ku el a okupá e puesto di presidente.
Universidat di Costa Rica a indiká den un komunikado ku e presupuesto pa edukashon den e pais mester ta na un mínimo di 8% i aktualmente gobièrnu di Chaves tin esaki na 5,8%.
